პანასონიკი მდგრად ინტელექტუალურ ქალაქს ააშენებს
27 ივნისი, 2012
1334
print

იაპონიაში შარშან მომხდარი მიწისძვრისა და ცუნამის შემდეგ, ქვეყანაში ერთიმეორის მიყოლებით იხურება ატომური ელექტროსადგურები, რასაც შედეგად ელექტროენერგიის დეფიციტი მოჰყვა.

მართალია, ამ დეფიციტის შევსება ხერხდება, მაგრამ ამის მიუხედავადაც, იქ სულ უფრო მეტ აქტუალობას იძენს ენერგიის განახლებადი წყაროების ათვისება. ამ საქმეში კი ერთ-ერთი ავანგარდისტი ხდება ელექტრონიკის მწარმოებელი გიგანტი "პანასონიკი", რომელმაც მომავლის ქალაქის პროექტი – "ეკოლოგიურად მდგრადი ინტელექტუალური ქალაქი" შეიმუშავა და თავის რვა პარტნიორ კომპანიასთან ერთად, მის განხორციელებას აპირებს.

პროექტის ხორცშესასხმელად, "პანასონიკმა" ქალაქ ფუძისავაში არსებული საკუთარი ძველი საწარმოს ტერიტორია შეარჩია, რომლის ფართობიც 47 აკრს აღწევს. პროექტის შესაბამისად, ამ ფართობზე 1000-სახლიანი "ინტელექტუალური ქალაქის" გაშენებაა შესაძლებელი, რომელსაც "ფუძისავას საზრიანი ქალაქი" ერქმევა. ის მისთვის საჭირო ელექტროენერგიის დიდ ნაწილს თავადვე გამოიმუშავებს. ამასთან, მისი შენობები ეკოლოგიისადმი მეგობრული იქნება. ამ ქალაქის აშენებით, "პანასონიკს" და მის პარტნიორებს იმის დემონსტრირება სურთ, თუ როგორი შეიძლება იყოს ეკოლოგიურად სუფთა ქალაქი, როდესაც მისი დაგეგმარებისა და მშენებლობისას, სხვადასხვა თანამედროვე, ენერგოდამზოგავ ტექნოლოგიას გამოიყენებენ.

"მდგრადი ინტელექტუალური ქალაქი" არის იმ კონცეპციის გაგრძელება, რომელიც "პანასონიკმა" ადრე შეიმუშავა. მისი განხორციელების შემთხვევაში, ქალაქის ინფრასტრუქტურა გარემოს, 1990 წელთან შედარებით, 70 პროცენტით ნაკლებად (ექვივალენტურად) დააბინძურებს.

ქალაქში ყველა შენობის სახურავი, ჰორიზონტალური და დახრილი ზედაპირი, მზის ელემენტებით დაიფარება. სწორედ მზის სხივისგან გამოიმუშავებს ქალაქი მისთვის საჭირო ელექტროენერგიის დაახლოებით 70 პროცენტს. ამასთან, დღის განმავლობაში, ჭარბად გამომუშავებული ენერგიის ნაწილს სპეციალურ აკუმულატორებში შეინახავენ. სახლებში ენერგოდამზოგავ, წყლის ეკონომიის, ნარჩენების გადამუშავების საშუალებებს გამოიყენებენ. გადამუშავებული ნაგვისგან კი საწვავს, სასუქს და სამშენებლო მასალებს დაამზადებენ.

ქალაქის ქუჩებში უსაფრთხოებას, ავტომობილების მოძრაობას, განათების სისტემას და სხვა ინფრასტრუქტურას, მართვის ინტელექტუალური სისტემა ავტომატურ რეჟიმში გააკონტროლებს. ამასთან, ამ სისტემას ადამიანის ჩარევა მხოლოდ პროფილაქტიკური შემოწმებისას დასჭირდება. საცხოვრებელი სახლების გარდა, ქალაქში ოფისები, სკოლა, საბავშვო ბაღი, სამედიცინო დაწესებულებები, სატრანსპორტო ტერმინალი, მაღაზიები, პარკი და სპორტული დასვენების ზონები განლაგდება.

"მდგრადი ინტელექტუალური ქალაქის" გახსნა 2014 წელს იგეგმება. "პანასონიკი" იმედოვნებს, რომ ქალაქის სრული დასახლება 2018 წელს დასრულდება, როცა იაპონურ კომპანიას, დაარსებიდან 100 წელი შეუსრულდება.

სხვა სიახლეები
15 თებერვალი, 2017 ქარის ენერგიით ჰოლანდიურ ლიანდაგებზე
13 სექტემბერი, 2016 ხელოვნური ინტელექტი რასიზმსა და ნეონაცისტურ შეხედულებებში დაადანაშაულეს
09 მარტი, 2016 ხელოვნური ინტელექტი ადამიანზე უპირატესობას გოს თამაშში ავლენს
25 თებერვალი, 2016 ნასამ მთვარეზე დაჭერილ უჩვეულო ხმებს ფარდა ახადა
10 თებერვალი, 2016 აშშ–ის საპრეზიდენტო მარათონს ახალი კანდიდატი ჰყავს – სუპერკომპიუტერი
08 თებერვალი, 2016 არამიწიერ ცივილიზაციათა დუმილი
02 თებერვალი, 2016 ილონ მასკის მარსზე გაფრენის გეგმა ნასას უსწრებს
27 იანვარი, 2016 კოსმოსურმა ნაგავმა შესაძლოა პოლიტიკური კრიზისი წარმოშვას
15 დეკემბერი, 2015 მასკისთვის მარსისკენ მიმავალ გზაზე დამაბრკოლებელი გარემოება მესამე მსოფლიო ომის შესაძლო დაწყებაშია
02 დეკემბერი, 2015 მარკ ცუკერბერგი "ფეისბუქის" აქციათა 99 პროცენტს ქველმოქმედებას მოახმარს