ეტიუდების საერთაშორისო ფესტივალი
24 მარტი, 2015
1033
print

27 მარტს მთელი მსოფლიო თეატრის საერთაშორისო დღეს აღნიშნავს. ამ დღისადმი მიძღვნილი ღონისძიებები იგეგმება ჩვენთანაც. მათ შორისაა ეტიუდების ფესტივალი, რომელსაც საქართველოს შოთა რუსთაველის თეატრისა და კინოს სახელმწიფო უნივერსიტეტი და მარჯანიშვილის თეატრი ტრადიციისამებრ ერთად ატარებენს.

ზედიზედ მეშვიდედ ფესტივალს უშუალოდ მარჯანიშვილის თეატრი უმასპინძლებს, წლევანდელი ფესტივალი იმ მხრივაა აღსანიშნავი, რომ მან ოფიციალურად შეიძინა საერთაშორისოს სტატუსი (თუმცა შარშან აზერბაიჯანელი და სომეხი მონაწილეებიც გვსტუმრობდნენ) და თბილისში ყაზახეთის, უკრაინის, სომხეთისა და ლიტვის უმაღლესი სახელოვნებო (თეატრალური) სასწავლებლების წარმომადგენლები ჩამოვლენ.

ფესტივალის განრიგი ასეთია: 24 და 25 მარტს 18 საათზე თეატრისა და კინოს სახელმწიფო უნივერსიტეტის სასწავლო თეატრის სცენაზე წინასაფესტივალო ჩვენებები გაიმართება. 26 მარტს მარჯანიშვილის თეატრში უცხოელი სტუმრების ეტიუდების რეპეტიცია და 5 უნივერსიტეტის საერთო ეტიუდისთვის მზადება იგეგმება. 27 მარტს, 16 საათზე მარჯანიშვილის თეატრის დიდ სცენაზე ფესტივალის მონაწილე ხუთივე ქვეყნის თეატრალური უნივერსიტეტების სტუდენტები წარმოადგენენ ეტიუდებს, რომელთა ხანგრძლივობა არ უნდა აღემატებოდეს 7 წუთს, განათება, ხმა და დეკორაცია კი მინიმუმამდე უნდა იყოს დაყვანილი.

საკონკურსო პროგრამის წარმოდგენის შემდეგ ჟიური გადაწყვეტილების მისაღებად განმარტოვდება და გამარჯვებულსაც გამოავლენს. დაასახელებენ გრან პრის მფლობელს, საუკეთესო საერთაშორისო, საუნივერსიტეტო, სამსახიობო, სარეჟისორო და ქორეოგრაფიულ ეტიუდებს, შეარჩევენ საუკეთესო ქალ და მამაკაც მსახიობებს. ასევე გასცემენ სტუდენტური ჟიურისა და თეატრისა და კინოს უნივერსტიეტის თვითმმართველობის პრიზებს. გამარჯვებულებს ფულად ჯილდოებს გადასცემენ თეატრალური უნივერსიტეტი და მარჯანიშვილის თეატრი.

ფესტივალის ორგანიზატორია უნივერსიტეტის სტუდენტური თვითმმართველობა, სამხატვრო ხელმძღვანელი რეჟისორი თემო კუპრავა გახლავთ. ფესტივალის მიზანია არა მხოლოდ თეატრის საერთაშორისო დღის აღნიშვნა, არამედ სტუდენტებში პროფესიული მოტივაციის ამაღლება, შემოქმედების პოპულარიზაცია, მათი წახალისება, ახალი სახეების აღმოჩენა და ტალანტების გამოვლენა.

თეატრის საერთაშორისო დღეს 1961 წლიდან აღნიშნავენ. მისი დამაარსებელია თეატრის საერთაშორისო ინსტიტუტი. ვინაიდან თეატრი გარდერობიდან იწყება, ამ დღეს აღნიშნავენ არა მხოლოდ თეატრის მსახიობები, რეჟისორები და დრამატურგები, არამეც სცენის მუშები, სუფლიორები და, ცხადია, გარდერობის პერსონალიც.

 

ia vekua
სხვა სიახლეები
16 ივლისი, 2018 ხელოვნური სულისკვეთებით
23 მარტი, 2016 "ჯამბაზები", ჯორჯიო და სიცილიური ნეორეალიზმი
03 მარტი, 2016 ემიგრანტი მუსიკოსები – საქართველოსთვის
21 თებერვალი, 2016 ის, რასაც ვერ ვხედავ
15 თებერვალი, 2016 "ორფეუსი" და ხატია ბუნიათიშვილი
18 ნოემბერი, 2015 მირანდა ესაკია მჭადს არ გვიცხობს... მას RONE ჩამოყავს და „საბაგიროს“ აკეთებს!
17 ნოემბერი, 2015 თამუნა სირბილაძე: "მხატვრობაში საკმარისად კარგი არასოდესაა საკმარისად კარგი"...
29 ოქტომბერი, 2015 ქართული ღვინო, როგორც მუსიკა
19 ოქტომბერი, 2015 "ქართული ნაციონალური ბალეტის" იუბილე ამერიკულ სცენაზე
02 ოქტომბერი, 2015 თბილისი Fall Set-ის მოლოდინში - წლის ბოლო ივენთი Set Fest-ისგან