თბილისი დაბოღმილი ქართული პოლიტიკისგან უნდა გათავისუფლდეს
14 მარტი, 2014
1738
print

ოცნებამ ნაცმოძრაობისთვის სანიტრის როლი ითამაშა  ინტერვიუ ძველი თბილისის  რაიონის გამგებელთან,  თბილისის მერობის კანდიდატ ნიკა მელიასთან

- ნაციონალური მოძრაობა ატარებდა პრაიმერიზს იმის გასარკვევად, თუ ვინ იბრძოლებდა თბილისის მერის პოსტისთვის 15 ივნისის არჩევნებში. თუმცა, ორი კანდიდატიდან ერთ-ერთმა, გიორგი ვაშაძემ თქვენს სასარგებლოდ მოხსნა კანდიდატურა. თქვენი მხარდამჭერებისთვის, დელეგატებისთვის ეს ერთგვარი იმედგაცრუება იყო...

- პირადად ჩემთვის ნამდვილად საინტერესო იქნებოდა ის დინამიკა, რომელსაც პრაიმერიზი აჩვენებდა. თუმცა, შეწყდა მხოლოდ ის პროცესი, რომელიც თბილისის მერობის კანდიდატის გამოსავლენად ტარდებოდა. სხვადასხვა ქალაქებში და მაჟორიტარი კანდიდატების გამოვლენისთვის კი, ათივე რაიონში ჩატარდება, თუკი იქ კონკურენცია იარსებებს.

მართლაც უჩვეულო აქტივობა იყო პრაიმერიზის პროცესში, მეც არ ველოდი ამას. თბილისში დაახლოებით 14 ათასამდე დელეგატი დარეგისტრირდა. რა თქმა უნდა, ამ ადამიანების წინაშე წარდგომა და ეს ერთთვიანი პროცესი ძალიან საინტერესო იქნებოდა და ეს მუხტი მხოლოდ პოზიტივს მოგვიტანდა ჩვენც და მათაც. სამწუხაროდ, ეს მინუსი აქვს იმ გადაწყვეტილებას, რომელიც გიორგიმ მიიღო. თუმცა, ამას ობიექტური მიზეზებიც აქვს - გიორგიმ ჩათვალა და ამაზე თავად ისაუბრა, რომ სურვილი აქვს არა მხოლოდ თბილისზე იყოს მიჯაჭვული, არამედ სხვა ქალაქებშიც მოახდინოს საკუთარი შესაძლებლობების რეალიზება წინასაარჩევნო კამპანიაში.

- 2012 წლის საპარლამენტო არჩევნებში თბილისში ნაციონალებმა, თუ არ ვცდები, დაახლოებით, 27 პროცენტი აიღეს. რა შეიცვლება ადგილობრივი არჩევნებისთვის თქვენს პოლიტიკურ ორგანიზაციაში, რა გაძლევთ გამარჯვების იმედს?

- ბევრი ისეთი ფაქტორი მუშაობს, რის გამოც შეიძლება თბილისელებმა ჩათვალონ, რომ ამ ეტაპზე მე ვარ სწორი კანდიდატი თბილისის მერის პოსტზე. ერთია ის, რომ მაქვს ამისი გამოცდილება და შესაძლებლობა და 1,5 წლის განმავლობაში, დღედაღამ თბილისის პრობლემებზე მუშაობით ვარ დაკავებული.

ზოგადად პოლიტიკურ ფონს თუ მიმოვიხილავთ, ხალხი იმდენად იმედგაცრულებულია...

- რაიმე კვლევა ჩაატარეთ?

- თბილისი არ არის ძალიან დიდი ქალაქი, რომ ეს ვერ გაიგო. დამიჯერეთ, ჩემს გარშემო შეიძლება უფრო მეტი არა ნაციონალური მოძრაობის მხარდამჭერია. ყველანაირი პოლიტიკური შეხედულების დიდი სამეგობრო, სამეზობლო მყავს და ვფიქრობ, რომ იმ ფონზე, როდესაც ქვეყანაში და ქალაქში ყველაფერი გაჩერებულია, ეს სულაც არ იქნება მოულოდნელი. ამ 1,5 წლის განმავლობაში, დაახლოებით, 6 000 ადამიანს შევხვდი და ზოგს რამდენჯერმეც. სურათი აშკარად შეცვლილია, ამ ხალხმა ბევრი აუსრულებელი დაპირება იხილა. გარდა ამისა, რეალურად, ახალმა ცენტრალურმა ხელისუფლებამ ვერ ისწავლა წინა ხელისუფლების შეცდომებზე, ერთი-ერთში იმეორებენ ამ შეცდომებს. მაგალითად - რამდენიმე დღის წინ ჩემთვის ცნობილი გახდა, რომ საჯარო სამსახურებში იკვლევენ და აკეთებენ სიებს, თუ ვინ არის მათი მხარდამჭერი და ვინ უჭერს მხარს ნაციონალურ მოძრაობას. სამწუხაროდ, ეს ადრეც კეთდებოდა და ეს ნამდვილად არ არის ნორმალური. მაგრამ, რა მნიშვნელობა აქვს, რომელი ძალოვანი სტრუქტურა ჩაერევა აქტიურად საარჩევნო პროცესში - კუდ-ი თუ სუს-ი?! დღეს სუს-ია ჩართული, ანუ რეალურად არაფერი შეცვლილა.

- ჩემი კითხვა უფრო ნაციონალების ტრანსფორმაციას ეხებოდა...

- ამ მხრივ პრაიმერიზმა ძალიან მნიშვნელოვანი ცვლილებები გამოიწვია, ძალიან ბევრი ახალი სახე წამოვიდა, ეს უკვე სიახლეა. გარდა ამისა, არ ვიცნობ ადამიანს, ვინც არ აცნობიერებს საკუთარ შეცდომებს. ამ პროცესში გარკვეულწილად დაგვეხმარა ქართული ოცნებაც - ოცნებამ ნაცმოძრაობისთვის სანიტრის როლი ითამაშა ისევე, როგორც მგელი თამაშობს ტყის სანიტრის როლს - მგელი შედის ტყეში და დასნეულებულ ცხოველებს ანადგურებს, რომ ტყე არ გაიხრწნას. ქვეყნის მასშტაბით პარტიის აქტივის, დაახლოებით, 25 პროცენტმა, სხვადასხვა დონის პარტიულ თანამდებობებზე მყოფმა ადამიანებმა 2012 წლის 2 ოქტომბრის მეორე დღესვე გაიხადეს ერთი მაისური და ჩაიცვეს მეორე. როდესაც წლების განმავლობაში აქ არ ვარგიხარ და უკვე გამარჯვებული გუნდის რიგებში გადახვალ, იქაც აუცილებლდ არ ივარგებ. ასეთმა გადასულებმა სივრცე გამოათავისუფლეს და მოვიდა ბევრი ისეთი ადამიანი, რომელთაც ადრე შეხებაც კი არ ჰქონიათ პარტიულ საქმიანობასთან.

- მიუხედავად იმისა, რომ თბილისი, ზოგადად, ოპოზიციურ ქალაქად ითვლება, უმრავლესობა არ უჭერს მხარს ნაციონალურ მოძრაობას. ასეთი ადამიანების შემოსარიგებლად რა ნაბიჯებს გადადგამთ?

- ეს უნარი არათუ შემწევს, არამედ ამ სოციუმში ვცხოვრობ, სწორედ ასეთ ხალხთან მიწევს ყოველდღიური ურთიერთობა. პარტიულ კინკლაობებში არასოდეს ვყოფილვარ ჩართული, პარტიული ცხოვრებით არ მიცხოვრია. ჩემი პოლიტიკა უნდა იყოს თბილისი, თბილისელების პრობლემები და მოვიდა დრო, როდესაც თბილისი დაბოღმილი ქართული პოლიტიკისგან უნდა გათავისუფლდეს.

- როგორ?

- ამისთვის სამთვიან წინასაარჩევნო პერიოდში ყველა საშუალებას გამოვიყენებ. ამას ვაკეთებდი მთაწმინდის რაიონში მთელი ამ ხნის მანძილზე. ეს ერთი დიდი სოციუმია და იგივეს ვაპირებ მთელი ქალაქის მასშტაბით - არასოდეს ვანსხვავებდი, რომელ პოლიტიკურ ძალას უჭერდა მხარს ადამიანი, რომელიც გამგეობაში დახმარებისთვის მოდიოდა. ჩემთვის ეს არ არის მხოლოდ სამსახური, აქ ყოველთვის მაქვს განცდა, რომ თანასწორად უნდა გავუწოდო დახმარების ხელი ყველას. სამწუხაროდ, დღეს, როცა თბილისელი მიდის მერიაში, ან გამგეობაში, განცდა აქვს, რომ ის მიდის თანამდებობის პირებთან და რომ ისინი არიან მისი პატრონები. ჩვენ უნდა შევძლოთ, რომ ეს ურთიერთობა პარტნიორულ რეჟიმში გადავიყვანოთ, ჩვენ უნდა ვიქცეთ პარტნიორებად.

თბილისი არ არის უცნაური ქალაქი, ეს განსხვავებული ქალაქია თავისი პლუსებითა და მინუსებით. ჩემი აზრით, წინა წლებში თბილისში ურთიერთობის დონეზე იყო პრობლემები და ვფიქრობ, შემწევს უნარი გავამთელო ეს ჩატეხილი ხიდი. ექიმმა რაც არ უნდა სწორი მკურნალობის კურსი დაგინიშნოთ, მედიკამენტები ვერ გიშველით, თუ მან ფსიქოლოგიურადაც არ მოგამზადათ. მერიის, მუნიციპალიტეტის თანამშრომლებს სხვა ფუნქცია აქვთ, ისინი ძალიან ახლოს უნდა იყვნენ ხალხთან, რაც აქ ნამდვილად მოვახერხეთ.

- თქვენი აზრით, განსაკუთრებულად ბევრი მუშაობა რომელ სოციუმთან დაგჭირდებათ?

- ცალკე ვერავის გამოვყოფ, არ მინდა დისკრიმინაციულად გამომივიდეს. არც ერთი სეგმენტი არ არის იოლი. თუმცა, უკანასკნელი წლების განმავლობაში უფროსმა თაობამ ცოტა გარიყულად იგრძნო თავი. სამწუხაროდ, გაუჩნდათ განცდა, რომ რომ ისინი არ არიან ამ საზოგადოების აქტიური წევრები. ვფიქრობ, შევძლებ ამ განცდის გაქრობას, რადგან არაფერი არ მსიამოვნებს ისე, როგორც მათთან ურთიერთბა.

- შეგიძლიათ ჩამოთვალოთ თუნდაც რამდენიმე მთავარი რამ, რაც არასგზით არ უნდა გაკეთებულიყო ბოლო 10 წლის განმავლობაში, როცა ქალაქის ხელისუფლებაში ნაციონალები იყვნენ?

- პირველ რიგში რაც მახსენდება - ნაგავი დენზე არ უნდა მიბმულიყო. მართლა ვერ ვხვდები ლოგიკას, რატომ გაკეთდა ასე, ალბათ მეტი კონსულტაცია იყო საჭირო. ასევე, რაც არ მომწონს ესაა პუშკინის ქუჩის რეაბილიტაციის შედეგად, ორმხრივი საავტომობილო მოძრაობის ნაცვლად ცალმხრივის დაწესება. ამან დიდი პრობლემები გამოიწვია თბილისში, სატრანსპორტო ტრომბი გაჩნდა. თუმცა, გამოსწორების რესურსი არის, თან ისე, რომ შენარჩუნდეს ამ ქუჩის არქეოლოგიური ღირებულება, ტექნიკურად ეს შესაძლებელია.

ბევრი წარმატების კვალდაკვალ, ბევრი შეცდომაც იყო... გარდა ამისა, ცვლილებები უნდა შეეხოს მერიასაც. დღეს იქ, ძირითადად, საოპერაციო სამსახურებია. სამწუხაროდ, ნაკლებად ვხედავ იმ რგოლს, რომელიც მეტად იქნება ორიენტირებული განვითარებაზე, გაატარებს და დანერგავს რეფორმებს. მეტად უნდა დასაქმდეს მერიაში ახალგაზრდა თაობა, საკანონმდებლო დონეზე უნდა დაინერგოს ანაზღაურებადი სტაჟირება... ასე სახელდახელოდ ეს გამახსენდა, თორემ რა თქმა უნდა, ბევრი სხვა პრობლემაც იქნება.

- თბილისის საკრებულოსა და მთავრობის კონფლიქტურ ურთიერთობას ყველაზე კარგად გადაწყვეტს არჩევნები, მაგრამ იქამდე ქალაქმა უნდა იცხოვროს. რა შეგიძლიათ გააკეთოთ, რომ პოლიტიკური მოტივების მიუხედავად, ამ ორმა შტომ ქალაქის პრობლემებს ერთად მიხედოს მშვიდობიანად?

- ზოგადად, როდესაც ორ ადამიანს, ან ორ სუბიექტს შორის რაიმე კონფლიქტია, 99 პროცენტ შემთხვევაში ეს მეტნაკლებად ორივე მხარის ბრალია. მაგრამ იმაში, რაც უკანასკნელ პერიოდში მერიასა და საკრებულოს შორის ხდება, ობიექტურად მიჭირს ჩვენი თავის დადანაშაულება. ის დესტრუქციული ნაბიჯები, რასაც ახლა საკრებულო დგამს, მაფიქრებინებს, რომ მათ ერთადერთი მიზანი აქვთ - მაქსიმალურდ შებოჭილები, ხელშეკრულები ვიყოთ, რომ ეფექტურობა დავკარგოთ. ისინი თვლიან, რომ თუ წინასაარჩევნოდ გამგეობებში მეტი საშუალება გვექნება, თუკი მეტ მომსახურებას გავუწევთ თბილისელებს, ამით მათ მოვნუსხავთ და არჩევნების დღეს ჩვენ სასარგებლოდ გააკეთებენ არჩევანს. ისინი ფიქრობენ, რომ ჩვენ თბილისელებში მხოლოდ პოტენციურ ამომრჩეველს ვხედავთ, რაც არასწორია. ამითია განპირობებული ეს ურთიერთობა, სხვა რეალური მიზეზი არ არის. დარწმუნებული ვარ და მაქვს კიდეც ინფორმაცია, რომ ის, რაც საკრებულოს უმრავლესობის მხრიდან მომდინარეობს, ძალიან ბევრს არ მოსწონს კოალიციაში.

- შესაძლოა, ეს ასეც იყოს, რადგან რასაც ჩვენ მედიით ვხედავთ, ძირითადად, კოალიციაში მათი გამარჯვების შემდეგ გადაბარგებულები აქტიურობენ...

- არანაირი უფლება არ მაქვს, ვინმეს პიროვნული შეურაცხყოფა მივაყენო და ყოველთვის ვცდილობ, ამას თავი ავარიდო, მაგრამ ძალიან უცნაურია მათგან ბრალდებების მოსმენა. მე ახლოსაც არ ვიყავი ამ პროცესებთან, როცა ეს ადამიანები, ხშირ შემთხვევაში, ნაციონალური მოძრაობის დამფუძნებლებიც კი არიან და პარტიაში 2002-2003 წლებიდან თანამდებობებზე მუშაობდნენ, საკრებულოში იყვნენ, როდესაც დენი ნაგავს ებმებოდა და ამას ხმა მისცეს... სამწუხაროდ, ამ ხალხმა დათვური სამსახური გაუწია თბილისის მერს, გიგი უგულავას. შეიძლება ადამიანს ჰქონდეს კარგი იდეა, მაგრამ პრაქტიკაში ამ იდეის განხორციელებისთვის საჭირო იყო დეპუტატების, ქვემდგომი ჩინოვნიკების რჩევა. ხალხი, რომელსაც რასაც ჩასძახებ, იმას ამოგძახებს, ყოველთვის დამღუპველია. მაშინ რომ პრაიმერიზი ჩატარებულიყო, ბევრი ასეთი დეპუტატი ვერ მოხვდებოდა საკრებულოში, შეჯიბრებითობის პრინციპი ამას გამორიცხავს.

- ერთი დიდი პრობლემაა ქალაქის გამწვანება, მშენებლობები რეკრეაციულ ზონებში. ამის შესახებ საუბრობენ საერთაშორისო გარემოსდაცვითი ორგანიზაციები, უბრალოდ ბუნების მოყვარულები. ვაკის პარკში სასტუმროს ჩადგმის წინააღმდეგ უკვე თვეების განმავლობაში დღე და ღამე მიმდინარეობს საპროტესტო აქცია...

- გულწრფელად გეტყვით, ეს არის პრობლემა.

- ვინ ქმნის ამ პრობლემას?

- ამაზე საუბარი შორს წაგვიყვანს. ზოგი ამბობს, რომ იმდაგვარი რეგულაციებია, თითქოს ყველაფერი კანონიერად არის, მაგრამ მაინც უკმაყოფილოები არიან. თუმცა, რა თქმა უნდა, მეტი სიფრთხილეა საჭიროა, მეტი კონსულტაცია და ინფორმაციის მიწოდება. ვიცი, რომ თბილისში უფრო მეტი რეკრეაციული ზონა განაშენიანდა, ვიდრე დაზიანდა, მაგრამ საზოგადოებამ ეს არ იცის.

- ისედაც ეკოლოგიურად დაბინძურებული ქალაქის ცენტრში რეკრეაციულ ზონებში უხეში ჩარევა ძალიან თვალში მოსახვედრია - ვაკის პარკის გარდა, ძველ იპოდრომზე საბურთალოს ქუჩაზე, ბოტანიკურ ბაღში...

- იპოდრომი ბიძინა ივანიშვილის საკუთრებაშია. იქ აქვს სანერგე მეურნეობა. დიახ, მეც ვერ დავეთანხმები და არ მომწონს, როდესაც ნადგურდება მწვანე საფარი, იჭრება ხეები, მიმაჩნია, რომ სოლოლაკის ხეივანშიც უადგილოა ასეთი მშენებლობები, მაგრამ მაშინ დავიჯერებ ობიექტურობას, როდესაც ვაკის პარკზეც აიმაღლებთ ხმას და იმაზეც, რაც სოლოლაკის ხეივანში გაკეთდა.

- ყველა ამ ადგილზე მშენებლობის ნებართვა სწორედ თბილისის მერიამ გასცა.

- დიახ და არ უნდა გაცემულიყო. ვაკის პარკში ცოტათი განსხვავებული სიტუაციაა - რესტორანი არსებობდა წლების განმავლობაში, მაგრამ რა თქმა უნდა, ქალაქი განიცდის სარეკრეაციო სივრცეების, სპორტული მოედნების ნაკლებობას - მთაწმინდის რაიონში მოსვლის დღიდან ვეძებ ადგილს, სადაც ფეხბურთის მოედანს გავაკეთებდი და ადგილი ვერ ვიპოვე, არ არის. სადაც ადგილი იყო, ყველგან სახლი ჩადგეს.

- მუნიციპალიტეტს ეხება აგრეთვე ქალაქში საშინლად დაზიანებული გზების შეკეთება. რატომ ვერ ვხედავთ გზის ხელოსნებს ქუჩებში?

- გზაზე, რომელიც ბოლო წლების განმავლობაში კაპიტალურად შეკეთდა, დაზიანებები არ არის. თუმცა, თბილისში ჯერ კიდევ ვერ შეკეთდა კაპიტალურად ყველა ქუჩა და ორმოულები გაჩნდა. ათმა კომპანიამ გაიმარჯვა ტენდერში თბილისის მასშტაბით 10 რაიონში, თითო კომპანია პასუხიმგებელია თავის სამოქმედო ტერიტორიაზე. ძალიან ინტენსიურად მუშაობენ, უბრალოდ მკაცრი ზამთარი იყო და მეტად დაზიანდა გზები. შესაძლოა, რიგ შემთხვევებში დაგვიანდა კიდეც, ან ამინდებმა არ შეგვიწყეს ხელი. თუმცა, 2 კვირის თავზე თბილისელებს ეს პრობლემები არ ექნებათ.

- არჩევნებიდან 2 კვირაში?

- დღეიდან 2 კვირაში. ზოგადად საგზაო ინფრასტუქტურის მოწყობას ძალიან ბევრი რამ უნდა. მხოლოდ ასფალტის საფარის დაგებას აზრი არ აქვს, თუ შიდა კომუნიკაციები არ გამოიცვალა. ამიტომ სეგმენტებად ვაგებთ.

- ორ საქმეში ხართ ბარალდებული - ბანკი “ქართუს” გაკოტრების საქმეზე და “ლა ტრუფეს” ეპიზოდში. რა სტადიაზეა ეს საქმეები?

- ბანკი “ქართუ”-ს საქმე იყო სულ პირველი საქმე, რომელიც აღიძრა ახალი ხელისუფლების პირობებში. გაოცებული ვარ, რატომ გადადგეს თავის დროზე ეს ნაბიჯი. თუ არ ვცდები, 35 ბრალდებული ვიყავით, საბრალდებო სკამი არ გვყოფნიდა... ეს საქმე მიმდინარეობს. ბოლო 2 თვეა სხდომა არ ჩატარებულა. მყავს ბავშვობის მეგობრები, სკოლის მეგობრები, უნივერსიტეტის მეგობრები და ახლა სასამართლოს მეგობრები გავიჩინე. იქიდან 95 პროცენტს არც კი ვიცნობდი. სამი იყო ყოფილი საჯარო მოხელე და დანარჩენი ე.წ. ბიზნესმენები.

- ახლა 17 ბრალდებული დარჩით. დანარჩენები სად არიან?

- ზოგი უკვე დასაქმდა საჯარო სამსახურებში თანამდებობებზე, ზოგი დაბრუნდა კერძო სექტორში. სასამართლო ძალიან მდორედ მიმდინარეობს. თუ რაიმე არაპროგნოზირებადი არ მოხდა, მე ვიცი რა იქნება საბოლოო გადაწყეტილება, დარწმუნებული ვარ ამაში.

რაც შეეხება მეორე საქმეს - სამწუხაროა, რომ საგამოძიებო ორგანოები ყველაფერს აკეთებდნენ იმისთვის, რომ ბრალდებული მე ვყოფილიყავი. ჩხუბი სოციალური მოვლენაა და ნებისმიერს შეიძლება შეემთხვეს თბილისში, მაგრამ არ მიჩხუბია და მიმტკიცებენ, რომ ვიჩხუბე. ნამდვილად არ დავმალავდი, რომ მეჩხუბა, რადგან საზოგადოებრივი თავშეყრის ადგილზე ეს შეიძლება მოხდეს. ამ საქმეზე წელს საერთოდ არ ჩატარებულა სასამართლო, უბრალოდ, ასეთ საქმეებზე ფიქრობენ, რომ დამოკლეს მახვილივით კიდია ჩვენს თავზე.

გუშინწინ საგამოძიებო ორგანოში აბსურდული ბრალდებით დაიბარეს საბურთალოს რაიონის გამგეობის თანამშრომლები და ამხანაგობის თავმჯდომარეები. თითქოს, ისინი იღებდნენ თანხებს იმისთვის, რომ ნაცმოძრაობის აგიტაცია ეწარმოებინათ. სრული აბსურდია. ერთ-ერთმა ადამიანმა თქვა, რომ იყო ქართული ოცნების კოორდინატორი და ამავე დროს თავისი კორპუსის ამხანაგობის თავმჯდომარე... სწორედ პოლიტიკური დევნის ნიშანია ასეთი საქმეები, როცა დღეგამოშვებით გვიბარებენ და გამომძიებლები და პროკურორები თვითონაც უხერხულ მდგომარეობაში ვარდებიან. ეს არის საჭირო სურათის და ნიუსის შექმნა, რომ აი, დამნაშავე მერიის თანამშრომლები კამერების წინ შედიან დაკითხვებზე.

- აქ რომ მოვდიოდი, გავრცელდა ინფორმაცია იუსტიციის ყოფილი მინისტრის ზურაბ ადეიშვილის სკაიპით გამოკითხვის შესახებ, სადაც მან თქვა, რომ მუნიციპალური განვითარების ფონდის თავმჯდომარეს მან პირადად თხოვა, გარკვეული თანხა გადაეხადა ნაცმოძრაობის კოორდინატორებისთვის, ოღონდ ამის შესახებ არც გიგი უგულავამ იცოდა და არც ნაციონალურმა მოძრაობამო. რა იცით ამის შესახებ? მართლაც, როგორც პარლამენტის თავმჯდომარემ თქვა, არჩევნების გამო შვებულებაში ხომ არ წავლენ სამართალდამცავები?

- ამის შესახებ არაფერი ვიცი. რაც გამოსაძიებელია, უნდა გამოიძიონ, მაგრამ ხელისუფლებაში მოვიდნენ იმისთვის, რომ ქვეყანა მართონ და არა პროკურატურა. ძალიან ააქტიურებენ საგამოძიებო ორგანოებს, სამართალდამცავებს იმისთვის, პოლიტიკურ მიზნებს მიაღწიონ. სამწუხაროდ, ეს პრობლემები ადრეც იყო, იყო მოსმენებიც, ეს არის ცუდი. მაგრამ ახლა არ არის? ზუსტად იგივენაირად უსმენენ, ის ხალხი არსად წასულა, მეთოდები არ შეცვლილა და ესაა უბედურება. რეალურად ერთ წრეზე ტრიალს არ უნდა დაემსგავსოს ცხოვრება. მე რაც მახსოვს, ერთ წრეზე ვართ ნამდვილად, ამასობაში კი ხალხის მდგომარეობა სულ უფრო უარესდება. ყველა ვაღიარებთ, რომ ბევრი წარმატება იყო, გაკეთდა ბევრი რამ და მათ შორის, ბევრი შეცდომაც იყო. მაგრამ ახალმა ხელისუფლებამ განვითარების სხვა ეტაპზე გადასვლა უნდა შეძლოს, - კარგი შევინარჩუნოთ, ცუდზე უარი ვთქვათ. დღეს კი ცუდზე უარი ნამდვილად არ უთქვამთ - ვგულისხმობ მოსმენებს, სიების შედგენას საჯარო სამსახურებში და ა.შ. კარგი კი არაფერი ხდება. თბილისში არაფერი არ იმალება.

წინა ხელისუფლება იყო შედეგზე ორიენტირებული, სწრაფად უნდოდათ საქმის კეთება. ესენი კი პროცესზე არიან ორიენტირებულნი - შევქმნათ კომისია, საბჭო, მოდით ვიმსჯელოთ, ვიმსჯელოთ... და აქ იფერფლებიან.

- კანონით, არჩევნებამდე 45 დღით ადრე უნდა გადადგეთ თანამდებობიდან. როგორ საარჩევნო სტრატეგიას ირჩევთ?

- მაქსიმალური ორიენტირება თბილისელების პობლემებზე, არანაირი ჩართულობა ეროვნულ პოლიტიკაში. მე მართლა არ მაინტერესებს პოლიტიკა, კლასიკური გაგებით ჩემი პოლიტიკა თბილისია და მინდა ამ მორევში ვიყო. უახლოეს მომავალში გვექნება პროგრამა, რომელსაც ხალხს შეხვედრებზე გავაცნობთ...

- ფიქრობთ, რომ დადგა დრო, როდესაც ამომრჩეველზე პროგრამა იქონიებს გავლენას?

- სამწუხაროა, რომ საარჩევნო მანიფესტს არავინ ყურადღებას არ აქცევდა არც ერთ არჩევნებზე და ასეა ახლაც. მაგრამ ეს პროგრამა აუცილებლად მაქსიმალურად უნდა დავიყვანო თითოეულ თბილისელამდე. ძალიან ბევრი სიახლე იქნება. გარდა ამისა, რასაც თბილისელებს შევთავაზებ, იქნება სრულიად განსხვავებული ურთიერთობა მერიის სამსახურებსა და თბილისელებს შორის. არ არის აუცილებელი, ადამიანი მაშინ მოვიდეს გამგეობაში და მერიაში, როცა მას უჭირს, შეიძლება მაშინ მოვიდეს, როცა მას დაპატიჟებ. სულიერი საზრდო ძალიან მნიშვნელოვანია და ესეც უნდა გავცეთ.

- სახელისუფლო კანდიდატს, თქვენს კონკურენტს დავით ნარმანიას როგორ შეაფასებთ?

- ვერ და არ ვიკადრებ, რასაც თავად და მისი თანამოაზრეები ამბობენ, რომ ის არის უალტერნატივო კანდიდატი. ნამდვილად არ მესმის, რის ფასად გახდა ეს ადამიანი უალერნატივო. პოლიტიკური ვითარება ძალიან განსხვავებულია იმისგან, რაც იყო საპარლამენტო, თუ გნებავთ, საპრეზიდენტო არჩევნების დროს. მიუხედავად იმისა, რომ ნარმანიას ძლიერი სახელისუფლო კოალიცია შეუსრულებს ორთქმავლის ფუნქციას, მას ძალიან გაუჭირდება გამარჯვება. საარჩევნო კამპანია ძალიან საინტერესო რამაა, რადგან რამდენადაც შეიძლება დაიკლოს კანდიდატის რეიტინგმა, იმდენად შეიძლება აიწიოს კიდეც. ვფიქრობ, ეს არჩევნები ძალიან არაორდინალური, აქამდე ჩატარებული ყველა არჩევნებისგან განსხვავებული იქნება, რადგან მსგავსი მოცემულობა არ შექმნილა პოლიტიკურ საჭადრაკო დაფაზე.

ხალხში იმედგაცრუებაა ნამდვილად, რადგან რთულია, როცა პირდები და მერე არ უსრულებ და მარტო იმას აყურებინებ, როგორ დასდევ ვიღაცას დასაჭერად, ეს შრატი საზოგადოებამ უკვე გაიკეთა და ეს არ არის საკმარისი. მარტო მთაწმინდის რაიონში 1800 ბენეფიციარი დადიოდა უფასო სასადილოებში, დღეს 2400 სოციალურად დაუცველი დადის და წარმოიდგინეთ ის ხალხიც, ვისაც მოერიდა და განცხადება ვერ დაწერა.

- საარჩევნო ბრძოლას რას დაარქმევთ?

- ეს იქნება ბრძოლა უკეთესი თბილისისთვის.

- თქვენი სლოგანიც ეს იქნება?

- არა. ჯერჯერობით ამას ვერ გეტყვით.

- საპრეზიდენტო არჩევნებზე უფრო მეტ აქტივობას ელით?

- ველი. ვფიქრობ, შევძლებ იმ თბილისელების დარწმუნებას, ვინც დღეს ფიქრობს, რომ ჩემი კანდიდატურა არ არის მიმზიდველი და საინტერესო. ვფიქრობ, ამას მოვახერხებ და საპირისპირო განცდას გავუჩენ. ეს არ იქნება მხოლოდ პარტიული არჩევნები. ეს იქნება პიროვნული არჩევნები, რადგან თბილისი სხვა ტიპის ქალაქია, აქ პოლიტიკოსების ენა ბევრს არ ესმის.

- ანუ, გასტრანომთან ლუდის დალევას აპირებთ?

- მაგას არ ვგულისხმობ. ამ ქალაქში მწვავე სოციალური პრობლემებია, უმუშევრობაა... თბილისელებს საქმეზე კონკრეტული საუბარი ურჩევნიათ.

- თქვენი კონკურენტის რომელ სუსტ წერტილებს გამოიყენებთ საარჩევნო ბრძოლისთვის?

- ვფიქრობ, ჩემი კონკურენტი თბილისის პრობლემებს არ იცნობს. მე არ ვამბობ, თბილისს არ იცნობს-მეთქი, თუმცა შესაძლოა, თბილისსაც არ იცნობს და დიდი დრო დაჭირდება, რომ გაიცნოს ეს ქალაქი. შესაბამისად, არ იცნობს აქ არსებულ პრობლემებს. იყო ინფრასტრუქტურის მინისტრი არ ნიშნავს, რომ კარგი მინისტრი ხარ. თბილისის პრობლემები არ იცის, რადგან არასოდეს ყოფილა ამ საქმით დაკავებული. მისგან განსხვავებით ეს ინსტიტუციონალური მეხსიერება მე მაქვს, რაც ახლაღა უნდა დააგროვოს ნარმანიამ - უნდა მოვიდეს, გაერკვეს, ამას კი, ძალიან დიდი დრო დაჭირდება. რა თქმა უნდა, პროცესზე იქნება ორიენტირებული, შეიქმნება კომისიები, საბჭოები და ეს იმის მაგივრად, რომ უბრალოდ მიხვიდე ღუმელთან და საქმეს შეუდგე.

ნაცმოძრაობის პლუსი იყო, რომ კარგ საქმეს ძალიან სწრაფად აკეთებდნენ და მინუსი, რომ შეცდომებსაც სწრაფად უშვებდნენ.

დღეს, პრაქტიკულად, არ გვყავს ხელისუფლება და გვყავს ორი ოპოზიცია - ერთი რეალური და მეორე - ოპოზიციის ოპოზიცია. ძალიან რთულია, ხელისუფლებას ხელისუფლება უწოდო, როცა 1,5 წლის განმავლობაში პოლიტიკურ ინიციატივას ვერ იგდებს ხელში და სულ თავდაცვით რეჟიმშია. პიროვნულად არავის ვაკნინებ, მაგრამ კოალიციის კვალიფიკაცია უკეთესის სურვილს ტოვებს.